Ифтитоҳи зеристгоҳи барқии 110/20/10 кВ ва хатти интиқоли барқи 04 килловолт дар деҳоти Ромити шаҳри Ваҳдат

8 октябри соли 2020 Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Ваҳдат зеристгоҳи барқии 110/20/10 кВ ва хатти интиқоли барқи 04 килловолт дар масофаи 53 километр барои 9 деҳаи деҳоти Ромитро мавриди истифода қарор доданд.

Татбиқи лоиҳаи бунёди зеристогоҳи барқии 110/20/10 кВ ва хатти интиқоли барқи 04 килловолт дар масофаи 53 километр барои дастрасии мардуми деҳот ба нерӯи барқ нигаронида шуда, он имкон фароҳам овард, ки сокинони деҳоти Ромит - деҳаҳои Қоху, Девдара, Новаки поён, Новаки боло, Пушандоч, Вистан, Дашти мазор, Ғусғеф ва Пичеф, дар маҷмуъ 9 деҳа, иборат аз 3 100 нафар аҳолӣ аввалин бор давоми солҳои тӯлонии истиқомат дар ин мавзеъ ба нерӯи барқ дастрасӣ пайдо намоянд.

Маблағи умумии гранти Агентии Корея оид ба ҳамкории байналмилалӣ 60 млн. сомониро ташкил дода, он барои корҳои сохтмонии зеристгоҳи барқии 110/20/10 кВ “Ромит”, хатҳои интиқоли нерӯи барқи 110, 20 кВ ва 0,4 кВ, насби ҳисобкунакҳои электронии барқӣ ва хизматрасониҳои мушовирӣ ҷиҳати назорати татбиқи лоиҳа, равона гардид.

Мардуми шукргузори шаҳри Ваҳдат сокинони деҳаҳои деҳоти Ромит ба Сарвари давлат барои туҳфаи арзишманд изҳори сипос намуданд, зеро акнун бо шарофати истиқлолият ва сиёсати созандаи роҳбарияти давлату Ҳукумати кишвар равшанию гармӣ ба хонадони ҳар як сокини деҳаҳои ин минтақа ворид шуд.

Корҳои сохтмониро ғолиби озмуни сохтмонӣ ширкати ватании Ҷамъияти саҳҳомии кушодаи “Тоҷикгидроэлектромонтаж” ба анҷом расонд.

Дар рафти татбиқи лоиҳа 46 нафар корманд бо кор ва маоши хуб таъмин буданд.

Дар баробари  ин, дар доираи лоиҳаи мазкур трансформаторҳо ва дигар таҷҳизотҳои барқии ба бунёди инфрасохтори зикргардида алоқаманд аз коргоҳҳои бонуфузи истеҳсолии ширкатҳои Чинт Электрик “Chint Electric”, Ҷинагсу Ругао Ҳиг Волтеҷ Электрик Аппартус “Jinagsu Rugao High Voltage Electric Appartus”-и Ҷумҳурии Халқии Хитой, Алимар Генератор “Alimar Generator” ва Метранак “Metranak”-и Ҷумҳурии Туркия ва “Южноуральский арматурно-изоляторный завод”-и Федератсияи Россия, ворид карда шуд.

Ҳамзамон, вобаста ба дастгирии молистеҳсолкунандагони ватанӣ, харидории такягоҳҳои хатҳои интиқоли барқи 20 кВ ва 0,4 кВ ба маблағи   2,4 млн. сомонӣ, аз Ҷамъияти дорои масъулияти маҳдуди “Поянда” ва зиёда аз 49 тонна ноқилҳои навъи гуногун аз Ҷамъияти дорои масъулияти маҳдуди “Ноқили Талко” ба маблағи 1,4 млн. сомонӣ харидорӣ ва дар лоиҳа истифода карда шудааст.

Бунёди инфрасохтори барқӣ ва мутаносибан васеъ гардидани имконияти бунёди инфрасохтори сайёҳӣ ва истифодаи таҷҳизоти муосир дар ин мавзеи сайёҳӣ, ҷиҳати ҷалби бештари сайёҳони дохилию хориҷӣ низ заминаи мусоид фароҳам меорад.

Мавриди зикр аст, ки татбиқи лоиҳаи “Сохтмони шабакаҳои барқӣ дар деҳоти Ромит” барои таъмини иҷрои саривақтии Нақшаи чорабиниҳо оид ба иҷрои дастуру супоришҳои Президенти  Ҷумҳурии Тоҷикистон муҳтарам Эмомалӣ Раҳмон, ки дар ҷараёни сафари корӣ ба шаҳри Ваҳдат 4 июни соли 2016 баён доштанд, пешбинӣ гардида, бобати амалишавии он Вазорати энергетика ва захираҳои оби ҷумҳурӣ бо Агентии Корея оид ба ҳамкории байналмилалӣ (KOICA) давоми солҳои 2016-2017 ҳамкориро ба роҳ монд.

Дар доираи лоиҳаи мазкур, бо маблағгузории Агентии Корея оид ба ҳамкории байналмилалӣ, барои барқтаъминкунии 9 деҳаи деҳоти Ромит сохтмони як адад зеристгоҳи барқии 110/20/10 кВ (бо насби як адад трансформатори 10 МВА), сохтмони тахминан 500 метр хати интиқоли барқи 110 кВ, сохтмони 46,75 км хати интиқоли барқи 20 кВ бо насби 810 адад такягоҳҳои оҳанубетонӣ, сохтмони 15 км хатҳои интиқоли барқи 0,4 кВ бо васлу насби 428 адад такягоҳ дар ҳамаи деҳаҳои зикргардида, насби 9 адад нуқтаҳои трансформатории 20/0,4 кВ, бо насби низоми ҳисоби нерӯи барқ иҷро гардид.

Бо супориши Ҳукумати ҷумҳурӣ назорати саривақтии татбиқи лоиҳа аз ҷониби Вазорати энергетика ва захираҳои об ва Агентии Корея оид ба ҳамкории байналмилалӣ, инчунин ширкати мушовирии кореягии “KEPCO”, таъмин гардид.

Баъди ифтитоҳ ва шиносоӣ бо шабакаҳои барқӣ дар деҳоти Ромит Президенти Ҷумҳурии Тоҷикистон муҳтарам Эмомалӣ Раҳмон ба сифати корҳои сохтмонӣ баҳои баланд дода, мавриди истифода қарор додани онро қадами муҳиме дар роҳи расидан ба истиқлолияти қомили энергетикӣ номиданд.

http://www.president.tj/ru/node/24227