Шиносоӣ бо рафти корҳои ободонӣ ва кабудизоркунӣ дар шаҳри Душанбе

5 март Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Раиси шаҳри Душанбе муҳтарам Рустами Эмомалӣ дар ноҳияҳои пойтахт бо рафти иҷрои дастуру супоришҳои Ҳукумати Ҷумҳурии Тоҷикистон, татбиқи амалии нишондодҳои Паёми Президенти Ҷумҳурии Тоҷикистон, аз ҷумла бо корҳои сохтмонӣ дар иншооти таъиноти гуногуни пойтахт, тадбирҳои бунёдкорию созандагӣ, кабудизоркунӣ, ниҳолшинонӣ, ҳифзи муҳити зист ва омодагӣ ба таҷлили ҷашни байналмилалии Наврӯз, шинос шуданд.

Тавре мушоҳида мегардад, аз рӯзҳои аввали соҳибистиқлолӣ Сарвари давлат муҳтарам Эмомалӣ Раҳмон ба рушду пешрафти пойтахти Тоҷикистони соҳибистиқлол - шаҳри Душанбе ҳамчун маркази маъмурӣ, сиёсӣ ва фарҳангии сарзамини аҷдодӣ таваҷҷуҳ зоҳир менамоянд.

Натиҷаи ҳамин аст, ки солҳои охир Мақомоти иҷроияи ҳокимияти давлатии шаҳри Душанбе ба таҳияи нақшаву чорабиниҳо, масъалаи ободонӣ ва таъмини шароити созгори зиндагӣ барои сокинони пойтахт аҳамияти хоса медиҳанд.

Аз рафти тадбирҳои созандагӣ дар ноҳияҳои пойтахт баръало мушоҳида мегардад, ки тавассути корҳои ободонӣ, таҳияи тарҳҳои муосир ҷиҳати сохтмони иншооти мухталиф, аз қабили мактабу бунгоҳҳои тиббӣ, марказҳои хизматрасонии маишию маданӣ, боғҳои фарҳангию фароғатӣ ва чароғону гулзор кардани кӯчаву хиёбонҳо, имрӯзҳо шаҳри Душанбе ба як макони дилфиреб, шаҳри сулҳу ваҳдат, хонаи умеди тоҷикону тоҷикистониён, мубаддал гардидааст.  

Боғҳои фарҳангию фароғатии бо тарҳи зебо сохташуда таваҷҷуҳи сайёҳони хориҷиро ба худ ҷалб кардааст.

Солҳои охир бо ташаббуси бевоситаи Президенти мамлакат муҳтарам Эмомалӣ Раҳмон ба Тоҷикистон навъҳои гуногуну нодири дарахтони бисёрсолаи ороишию сояафкан ворид карда шуда, дар шоҳроҳҳо, кӯчаву хиёбонҳо ва марказҳои фарҳангию фароғатии пойтахт шинонида мешаванд.

Гулу буттаҳо ва дарахтони ороишии воридшуда ба мавзеъу маҳалҳо ҳусни тоза мебахшанд ва ҳам барои саломатии инсон фоидаовар ҳастанд.

Имрӯз дар рӯзҳои аввали фасли зебои баҳор ба хотири истиқболи сазовори Наврӯзи байналмилалӣ ва вусъати корҳои ободонӣ Президенти мамлакат муҳтарам Эмомалӣ Раҳмон ва Раиси шаҳри Душанбе муҳтарам Рустами Эмомалӣ дар маъракаи ниҳолшинонии назди Масҷиди марказии ҷомеи шаҳри Душанбе иштирок карданд.

Нахуст Сарвари давлат муҳтарам Эмомалӣ Раҳмон бо рафти корҳои сохтмонӣ дар Масҷиди марказии ҷомеи шаҳри Душанбе ва иншооти нави Донишкадаи исломии Тоҷикистон ба номи Имоми Аъзам - Абӯҳанифа Нӯъмон ибни Собит шинос шуда, дар ҳудуди масҷиди ҷомеъ якчанд дарахти “клён” шинониданд.

Бо супориши Президенти мамлакат дар асоси нақшаи сохтмони масҷиди ҷомеъ дар ин ҷо дарахтони “магнолия”, “магнолияи баргпарто”, “каталпа”, “клён”, “ел”, “сливаи ороишӣ” ва берёза шинонида шудааст.

Зимни ҳар як боздид аз Масҷиди марказии ҷомеъи шаҳри Душанбе  Пешвои миллат муҳтарам Эмомалӣ Раҳмон барои анҷоми корҳои ободонию кабудизоркунии майдони назди он масъулини корҳои сохтмониро вазифадор мекунанд.

Саҳни ҳавлӣ, роҳраву дигар мавзеъҳои атрофи иншоот бо тарҳи хеле зебо оро дода мешавад. Барои ин бо дастуру ҳидояти Пешвои миллат муҳтарам Эмомалӣ Раҳмон нақшаву тарҳи муосир таҳия гардидааст. Атрофи бино чароғон карда шуда, фаввораҳо ва гулу буттаҳои ороишӣ ба муҳити ин ҷо бояд ҳусни тоза бахшанд.

Баъди шинонидани ниҳоли дарахтон Президенти мамлакат муҳтарам Эмомалӣ Раҳмон барои вусъати бештари корҳои ободонии ҳудуди масҷиди ҷомеъ ва даромадгоҳҳои иншоот ба мутахассисон дастуру ҳидоятҳои мушаххас доданд.

Ёдовар мешавем, ки рӯзи 24 феврал Сарвари давлат бо иштирок дар маъракаи бунёди боғи нави интенсивӣ ва ниҳолшинонӣ дар ноҳияи Данғараи вилояти Хатлон ба мавсими корҳои баҳорӣ оғоз бахшиданд. Акнун шаҳрвандони мамлакат бояд бо истифода аз ҳар рӯзи мусоид баҳри истиқболи Наврӯз корҳои ободонӣ, созандагӣ ва ниҳолшинониро вусъат бахшанд. 

Баъди шинонидани ниҳол дар саҳни ҳавлии Масҷиди марказии ҷомеъи шаҳри Душанбе Пешвои миллат муҳтарам Эмомалӣ Раҳмон дар боғи “Наврӯзгоҳ”-и пойтахт бо нашъунамои дарахтон ва корҳои ободонии ин мавзеъ шинос шуданд.

Боғи “Наврӯзгоҳ”-и пойтахт дар масоҳати 146 ҳазор метри мураббаъ доман паҳн кардааст. Дарахтони зебою нодири боҳашамати ороишию сояафкан ва гулу гулбуттаҳое, ки аз гӯшаҳои гуногуни дохил ва хориҷи кишвар ба ин ҷо оварда шинонда шудааст, аз ороишоти асосии ин боғ ба шумор меравад.

Дар боғи “Наврӯзгоҳ” дарахтони сосна, калина, туя, сирена, кедр, пихта, каталпа, можевелник, татум, магнолияи ҳамешасабз, чинор, берёзаи маҳаллӣ, каштан, барбарис, клёни сурх, лигуструм, кипарис, маҷнунбед ва гули садбарг шинонида шудааст.

Боғи пур аз дарахтони зебо дар шафати “Наврӯзгоҳ”, ки макони асосии баргузори тантанаҳои идонаи “Наврӯз”, “Ваҳдат”, “Истиқлолият” ва дигар идҳои бузурги миллӣ аст, ҷойгир мебошад. Аз ин ру Сарвари давлат ба коргарони боғ супориш доданд, ки ба масъалаи тозагии атроф, нигоҳубини дарахтон ва корҳои ободонӣ диққати махсус диҳанд.