Мулоқот ба журналистони Чин
Имрӯз дар Вазорати рушди иқтисод ва савдо мулоқоти Вазир Шариф Раҳимзода бо ҳайати Оҷонсии иттилоотии Чин баргузор гардид. Дар вохӯрӣ мудири шуъбаи ахбори байналмилалии ОИЧ Тян Бин, мудирони бахши Шэнсисӣ ва Тсзинхайии ОИЧ Чжан Кэ ва Ху Чжонъи ва якчанд хабарнигорони Оҷонсии мазкур ширкат варзиданд.
Дар оғози мулоқот Вазир ташрифи меҳмононро ба диёри офтобиамон хайрамақдам намуда, сипас, ба суолҳои журналистон оид ба таъсис ва дурнамои ҳалқаи иқтисодии Роҳи бузурги абрешим, вазъи имрӯзаи ҳамкории тиҷоратию иқтисодӣ байни Ҷумҳурии Тоҷикистон ва Ҷумҳурии Мардумии Чин, иқтидорҳои мавҷуда ҷиҳати густариши минбаъдаи ҳамкориҳои тиҷоратию иқтисодӣ байни ду кишвар посух гардонд.
Ш.Раҳимзода ҳамчунин фикру мулоҳизаҳои хешро перомуни фаъолияти корхонаҳои чинӣ ва муштарак дар пешбурди иқтисод ва таъсиси ҷойҳои нави корӣ, масъалаҳои асосие, ки дар ҷаласаи навбатии сарони давлатҳои аъзои СҲШ мавриди баррасӣ қарор хоҳанд гирифт, татбиқи лоиҳаи муштарак дар самти сохтмони роҳҳо, хатти интиқоли барқ, бунёди корхонаҳои саноатӣ ва ғайра иброз дошт.
