Баргузории ҷаласаи Шӯро оид ба тавсеаи табақаи миёнаи аҳолӣ
18 феврали соли 2025 дар Вазорати рушди иқтисод ва савдо таҳти роҳбарии Муовини якуми вазир Солеҳзода Ашурбой Абдувоҳид бо Роҳбари намояндаи доимии Гурӯҳи Бонки Ҷаҳонӣ Озан Севимлӣ, иштироки намояндагони вазорату идораҳои дахлдор ва коршиносони Бонки Ҷаҳонӣ ҷаласаи Шӯро оид ба тавсеаи табақаи миёнаи аҳолӣ баргузор гардида, дар он Методологияи муайян намудани сатҳи табақаи миёнаи аҳолӣ барои Тоҷикистон тасдиқ карда шуд.
Методологияи муайян намудани сатҳи табақаи миёнаи аҳолӣ бо дарназардошти хусусиятҳои хоси кишвар дар асоси супориши Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки 10 июни соли 2024 дар ҷаласаи Шӯрои миллии рушди назди Президенти Ҷумҳурии Тоҷикистон баён карданд, дар ҳамкории Вазорати рушди иқтисод ва савдо ва Агентии омор якҷо бо Гурӯҳи коршиносони Бонки Ҷаҳонӣ таҳия ва тасдиқ гардид.
Методология бори аввал барои Тоҷикистон таҳия гардида, механизми дақиқ ва фарогири арзёбии табақаи миёнаи аҳолиро муайян менамояд ва заминаи боэътимодро барои таҳияи сиёсати иҷтимоиву иқтисодӣ ва стратегияҳои рушд фароҳам меорад.
Илова бар ин, дар ҷаласа натиҷаҳои таҳлили камбизоатӣ ва баробарии иқтисодӣ, ки аз ҷониби Бонки Ҷаҳонӣ анҷом дода шудааст, мавриди баррасӣ қарор гирифтанд. Ин таҳлил ба дарки амиқи сатҳи некӯаҳволии аҳолӣ ва ташаккули сиёсати муассири иҷтимоиву иқтисодӣ дар кишвар мусоидат хоҳад кард.
Тасдиқи методологияи муайян намудани сатҳи табақаи миёнаи аҳолӣ як қадами муҳими стратегӣ дар рушди устувори иқтисоди миллӣ ва беҳсозии сатҳи зиндагии аҳолӣ маҳсуб меёбад. Ин иқдом барои таҳкими табақаи миёна ҳамчун такягоҳи асосии рушди иқтисодӣ ва устувории иҷтимоӣ дар Тоҷикистон замина мегузорад.
