Вохӯрии роҳбарияти Вазорати рушди иқтисод ва савдо бо ҳайати Бонки Осиёии Рушд
24 феврали соли 2025 дар Вазорати рушди иқтисод ва савдо вохӯрии Муовини якуми вазир Солеҳзода Ашурбой Абдувоҳид бо Чигдем Акин - Директори Дафтари идоракунии бахши давлатӣ ва идоракунии давлатӣ, роҳбари миссия, Анҷум Исрар - мутахассиси калони бахши давлатии дафтари мазкури Бонки Осиёии Рушд (БОР) баргузор гардид.
Солеҳзода А. А. иброз дошт, ки бо мақсади амалӣ намудани вазифаҳои Паёми Президенти Ҷумҳурии Тоҷикистон аз 21 декабри соли 2021 «Дар бораи самтҳои асосии сиёсати дохилӣ ва хориҷии ҷумҳурӣ» Стратегияи рушди иқтисоди «сабз» дар Ҷумҳурии Тоҷикистон барои солҳои 2023-2037 бо қарори Ҳукумати Ҷумҳурии Тоҷикистон аз 30 сентябри соли 2022, №482 қабул шуда, мавриди амал қарор дорад.
Дар доираи Стратегияи рушди иқтисоди «сабз» дар Ҷумҳурии Тоҷикистон барои солҳои 2023-2037 ҷиҳати мушаххас намудани корҳо дар самти рушди иқтисоди «сабз» Нақшаи амали он дар марҳилаи якум солҳои 2023-2025 мавриди амал қарор дорад.
Манбаи муҳими рушди иқтисоди «сабз» дар кишвар ин дастгирию сармоягузории институтҳои молиявӣ ва шарикони рушд мебошад, ки ҳамкории молиявии онҳо дар татбиқи Стратегияи мазкур саҳми калидӣ дошта, дар раванди татбиқи он бо институтҳои молиявӣ ва шарикони рушд, аз ҷумла Бонки Осиёии Рушд ҳамкории самаранок роҳандозӣ карда мешаванд.
Стратегия аз рӯи ҳадафу вазифаҳои дар бахшҳои он муайянгардида ба 5 марҳила тақсим карда шудааст, аз ҷумла марҳилаҳои якум ва дуюм (солҳои 2023-2025 ва солҳои 2026-2028) чорабиниҳо дар самти оммавигардонии маълумот оид ба иқтисоди «сабз», таълим ва ташаккули тафаккури иқтисодию экологӣ, ворид намудани принсипҳои иқтисоди «сабз» ба санадҳои меъёрии ҳуқуқӣ, риоя намудани онҳо ҳангоми қабули қарорҳои идоракунӣ ва оғози амалигардонии стандартҳои иқтисоди «сабз» дар соҳаҳои иҷтимоиву иқтисодии кишварро дар бар мегирад.
Айни замон дар вазорат корҳои омодагӣ барои таҳияи Нақшаи амали Стратегия дар марҳилаи дуюм солҳои 2026-2028 оғоз шуда, дар ин самт бо мақсади ҷалби сармояи хориҷӣ ҳамкориҳои судманд роҳандозӣ шудааст. Муовини якуми вазир иброз дошт, ки Бонки Осиёии Рушд яке аз шарикони боэътимоди Тоҷикистон ба шумор меравад ва нақши он дар татбиқи ҳадафу афзалиятҳои рушди иқтисоди «сабз» муҳим арзёбӣ мегардад.
Ҷонибҳо оид ба амалигардонии лоиҳаҳои сармоягузорӣ бо маблағҳои грантии Бонки Осиёии Рушд мубодилаи афкор намуда, самтҳои афзалиятноки татбиқи принсипҳои иқтисоди «сабз» дар соҳаҳои кишоварзӣ, энергетика, иқтисоди даврӣ, савдои электронӣ ва дигар соҳаҳо таъкид карда шуд.
Тарафайн бо мувофиқа расиданд, ки якҷо ҳамкориҳоро доир ба татбиқи Стратегияи рушди иқтисоди «сабз» дар Ҷумҳурии Тоҷикистон барои солҳои 2023-2037 идома дода, барои амалигардонии ташаббусҳои пешниҳодшуда чораҳои мушаххас меандешанд.
