Мулоқот бо роҳбарону мутахассисони Неругоҳи барқи обии “Роғун” ва фаъолони шаҳри Роғун

10 август дар шаҳри Роғун Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пас аз шиносоӣ аз рафти корҳои барқарорсозӣ дар Неругоҳи барқи обии “Роғун” бо роҳбарону мутахассисони неругоҳ ва фаъолони шаҳр мулоқот доир карданд.

Дар оғоз Сарвари давлат муҳтарам Эмомалӣ Раҳмон ба ҳамаи коргарони неругоҳ ва намояндагони ширкатҳои хориҷӣ барои заҳматҳои шабонарӯзиашон ба хотири пешрафти имрӯзу фардои Тоҷикистон ва расидан ба истиқлоли энергетикии кишвар сипосу миннатдорӣ баён карданд.

Таъкид гардид, ки аз оғози фаъолияти ду агрегати неругоҳ то имрӯз, аллакай, зиёда аз 6,4 миллиард киловатт-соат неруи барқ ба маблағи беш аз 1,5 миллиард сомонӣ истеҳсол ва ба низоми ягонаи энергетикии мамлакат интиқол дода шудааст.

Дар ин робита Сарвари давлат бори дигар хотиррасон карданд, ки барои таъмин намудани рушди муназзаму устувори иқтисоди миллӣ, қонеъ гардонидани талаботи рӯз ба рӯз афзояндаи соҳаҳои истеҳсолӣ ва аҳолии кишвар ба неруи барқ афзоиш додани истеҳсоли неруи барқ аз ҷумлаи заруратҳои аввалиндараҷа ба ҳисоб меравад.

“Суръат бахшидан ба ҷараёни корҳои сохтмони неругоҳи “Роғун”, дар муҳлатҳои муқарраргардида ва бо риояи стандартҳои байналмилалӣ тибқи нақша ба анҷом расонидани марҳалаҳои баланд бардоштани сатҳи сарбанд ва ба истифода додани агрегатҳои навбатӣ бисёр муҳим ва зарур мебошад”,- иброз доштанд Президенти мамлакат.

Имрӯз дар иншооти неругоҳ 14 ҳазору 164 нафар кормандони муҳандисиву техникӣ фаъолият доранд.

Шумораи мошину механизмҳое, ки дар сохтмон истифода мешаванд, ҳар сол аз ҳисоби хариди мошину механизмҳои пуриқтидори муосир зиёд гардида, ҳоло ба 3443 расонида шудааст.

Президенти мамлакат муҳтарам Эмомалӣ Раҳмон таъкид намуданд, ки дар сатҳи байналмилалӣ ташкил ва таъмин намудани назорати техникиву технологӣ дар иншооти “Роғун”, ки аз маҷмааи иншооти наздиктарини зеризаминӣ иборат аст, зарур ва ҳатмӣ мебошад.

Сарвари давлат хотиррасон намуданд, ки чун “Роғун” барои садсолаҳо на танҳо барои мардуми Тоҷикистон балки барои минтақа бунёд карда мешавад, муҳимтар аз ҳама, ба сифати баланди корҳои сохтмону васлгарӣ аҳаммияти аввалиндараҷа додан зарур аст.

Зимни суханронӣ Президенти мамлакат муҳтарам Эмомалӣ Раҳмон барои дар муҳлатҳои тасдиқшуда анҷом додани корҳои сохтмонӣ ва ба истифода супоридани агрегатҳои навбатӣ дар назди вазорату идораҳои давлатӣ, Шӯрои нозирони Ҷамъияти саҳҳомии “Неругоҳи барқи обии “Роғун” ва дигар сохторҳо вазифаҳои мушаххас гузоштанд.

Пешвои миллат муҳтарам Эмомалӣ Раҳмон бо итминон изҳор доштанд, ки мову шумо дар ояндаи наздик кишвари азизи хешро боз ҳам ободу пешрафта мегардонем ва талошу заҳмати ватандӯстонаи ҳар яки шумо дар китоби таърихи давлатдории навини Тоҷикистон бо ҳарфҳои заррин сабт мегардад.

Дар ҳамин ҷо пас аз анҷоми суханронии Сарвари давлат муҳтарам Эмомалӣ Раҳмон Сафарзода Хайрулло - директори генералии Ҷамъияти саҳомии кушодаи Неругоҳи барқи обии “Роғун, Азимов Хуҷамурод  - директори заводи таҷрибавии механикии шаҳри Норак, Сафаров Иқбол - директори генералии Ҷамъияти саҳомии кушодаи “Тоҷикгидроэлектромонтаж”, Арабзода Нуралӣ - директори иҷроияи Маркази татбиқи лоиҳаҳои таҷдиди роҳҳо ва Қоҳир Расулзода -  Сарвазири Ҷумҳурии Тоҷикистон оид ба рафти иҷрои корҳои сохтмонӣ, назорати сифати сохтмон, сохтмони сарбанд, ҳолати татбиқи лоиҳаи сохтмони иншооти неругоҳи барқи обии “Роғун” ва дигар масъалаҳои вобаста ба Неругоҳи барқи обии “Роғун” ҳисобот доданд.

http://president.tj/node/31231