Баррасии дурнамои нишондиҳандаҳои асосии соҳаҳои саноат, тандурустӣ, ҳифзи иҷтимоии аҳолӣ, маориф ва илм, кишоварзӣ, меҳнат, муҳоҷират ва шуғли аҳолӣ ва сармоягузорӣ дар соли 2026 ва параметрҳои асосии он барои солҳои 2027-2028

  

2 апрели соли 2025 тибқи талаботи фармоиши Ҳукумати Ҷумҳурии Тоҷикистон аз 1 октябри соли 2024, №92-ф дар вазорат бо иштироки намояндагони вазоратҳои саноат ва технологияҳои нав, тандурустӣ ва ҳифзи иҷтимоии аҳолӣ, маориф ва илм, кишоварзӣ, меҳнат, муҳоҷират ва шуғли аҳолӣ ва Кумитаи давлатии сармоягузорӣ ва идораи амволи давлатӣ муаррифии дурнамои нишондиҳандаҳои рушди иҷтимоию иқтисодӣ дар соли 2026 ва параметрҳои асосии он барои солҳои 2027-2028 баргузор гардид.

 

Ҷаласаро Муовини Вазири рушди иқтисод ва савдо Восидиён Фарҳод Саъдулло оғоз бахшида, баён намуд, ки мақсад аз баргузории ҷаласа иҷрои сифатноки дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти дарёфти манбаъҳои нави рушд, баланд бардоштани сатҳу сифати зиндагии аҳолӣ, таъмини амнияти озӯқаворӣ, истифодаи самараноки имконияту захираҳои мавҷуда, ба кор андохтани иқтидорҳои нав ва фаъол гардонидани иқтидорҳои амалкунанда ва дар маҷмӯъ таъмини рушди иқтисоди кишвар мебошад.

Қайд гардид, ки ҳангоми таҳияи дурнамои нишондиҳандаҳои рушди иҷтимоию иқтисодӣ дар соли 2026 ва параметрҳои асосии он барои солҳои 2027-2028 муқаррароти ҳуҷҷатҳои банақшагирии стратегӣ ба инобат гирифта шаванд. Дар ин раванд аз ҷониби муовини якуми Вазири саноат ва технологияҳои нав - Қурбонзода Исоҷон Ятим, муовини якуми Раиси Кумитаи давлатии сармоягузорӣ ва идораи амволи давлатӣ - Юсуфзода Фаррух Юсуф, муовини Вазири тандурустӣ ва ҳифзи иҷтимоии аҳолӣ – Амирзода Абдухолиқ Амир, муовини Вазири маориф ва илм - Музаффарзода Бадриддин, муовини Вазири кишоварзӣ – Нигина Анварӣ ва муовини Вазири меҳнат, муҳоҷират ва шуғли аҳолӣ - Нодирӣ Шаҳноза Анвар дурнамои нишондиҳандаҳои асосӣ дар соли 2026 ва параметрҳои асосии он барои солҳои 2027-2028 муаррифӣ карда шуд.

Баъд аз муаррифӣ нишондиҳандаҳои пешниҳодгардида мавриди баррасӣ қарор дода шуда, аз натиҷаи ҷаласа қарорҳои дахлдор қабул гардид.