15 декабри соли 2023 ҷаласаи Ситоди ҷумҳуриявӣ оид ба иҷрои қарори Ҳукумати Ҷумҳурии Тоҷикистон аз 28 марти соли 2023, №125 «Дар бораи сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2023-2024» баргузор гардида, дар он омодагии вилояти Суғд ва шаҳру ноҳияҳои он ба зимистонгузаронӣ мавриди баррасӣ қарор дода шуд.

14 декабри соли 2023 дар доираи ҷаласаи навбатии вазирон, ки дар шаҳри Парижи Фаронса оид ба Ҳафтаи АвруОсиёии Созмони Ҳамкориҳои Иқтисодӣ ва Рушд (СҲИР) баргузор гардид, Муовини вазири рушди иқтисод ва савдо Восидиён Фарҳод Саъдулло иштирок намуда, оид ба дастовардҳои кишвар дар самти содагардонии расмиёти савдо суханронӣ намуд.

Ҷиҳати иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 12 декабри соли 2023 аз ҷониби Вазири рушди иқтисод ва савдо Завқизода Завқӣ Амин, Директори Бонки Олмонии Рушд барои минтақаи Аврупои Шарқӣ, Қафқоз ва Осиёи Марказӣ хонум Вероника Гарсия дел Арко, Роҳбари намояндагии минтақавии Бонки Олмонии Рушд дар Осиёи Марказӣ Андреас Шнайдер ва роҳбари ширкати Помир Энерҷӣ Шартномаи иловагӣ оид ба пешниҳоди грант ба маблағи 10 миллион евро барои сохтмони Неругоҳи барқи обии «Себзор» ба имзо расонида шуд.